नजबुल खान महत्मा गाँधी शान्ति पुरस्कारबाट सम्मानित

 संवाददाता    ६ चैत्र २०७५, बुधबार १५:४७     650 जनाले पढ़िसके


नवसंग्राम दैनिक लहान, ६ चैत्र । आशन, भाषण र शासनमा महिला हुनुपर्छ भने माग राख्दै नोट आफ डिसेन्ट अभियान चलाइरहेकी नजबुल खान निलम महात्मा गान्धी एशियाली शान्ति पुरस्कारबाट आज सम्मानित भएकी छन् । नेपाल राष्ट्रिय मोडलिङ्ग संघले आज एक समारोहबीच बरिष्ट कलाकार सरोज खनालका हातबाट अभियान्ता खानलाई चैत्र ६ गते काठमाण्डौमा सम्मानित गरिएको छ । उदयपुरबाट अभियान चलाएर नजबुल खान यत्तिबेला देशभरी महिला हिँसा, लैगिँक हिँसा, घरेलु हिंसा, बालविवाह, दहेजप्रथा विरुद्ध शसक्त रुपमा महिला जागरण गर्दै आएकी छीन् । शान्ति पुरस्कारबाट सम्मानित हुनु भएकी खान यत्तिबेला कन्डम निःशुल्क पाइन्छ तर सेनेटरी प्याड निःशुल्क पाइँदैन भन्दै महिलालाई विभेद गरिएको उनको ठम्याई छ ।

खान महिलालाई स्थानीय तहले निःशुल्क रूपमा सेनेटरी प्याड वितरण गर्नुपर्ने अभियान सञ्चालन गरिरहेकी छिन् । मुस्लिम, दलित, जनजाति, एकल महिलाको उत्थान र हकअधिकारका लागि निरन्तर लागिपरेकी छिन् उनी । आवाजविहीनको आवाज बनेकी नजबुल स्वयंको आवाज भने धसिएको छ । आवाज फर्काउन धेरै कोसिस गरिन्, सकिनन् । उनी भन्छिन् ‘आफ्नै स्वरको अभावमा पीडित छु ।’ घरबाट बाहिर निस्किन हिचकिचाउने मुस्लिम महिलामध्ये नजबुल २०६२ सालको लोकतान्त्रिक जनआन्दोलनका क्रममा सडकमा आएकी थिइन् । आन्दोलनमा सहभागी भएका वेला २०६३ साल वैशाख ५ गते उनको घाँटीमा अश्रुग्यासको गोलीको खोका लाग्यो । उनी ५ घन्टासम्म बेहोस भइन् । भन्छिन्, ‘मेरो स्वर खोसिए पनि हिम्मत खोसिएको छैन ।’