कटारीमा वन कार्यालय नै विकासको वाधक बनेको उद्योगीको दावी

 संवाददाता    ३० बैशाख २०७७, मंगलवार ०८:४१     195 जनाले पढ़िसके


कटारी उदयपुर । वैशाख २९, सोमवार । उदयपुरको कटारी नगरपालिका ८ गान्टारबाट चुनढुंगा ढुवानी गर्दै आई रहेको सिद्धिचरण मल्टीप्रपोजले डिभिजन वन कार्यालय त्रिवेणी कटारीले आफुहरुको जेसिवी पक्राउ गरेर विकास निर्माणको काममा अवरोध गरेको बताएको छ । सयौं मानिस आवत जावत गर्ने १५वर्ष पूरानो सडकमा आफुहरुले पक्की नाला निर्माणका लागि खन्दा जेसिवी नै पक्राउ गरेर डिभिजन वन कार्यलय कटारीले विकासको काममा अवरोध गरेको उसले दावी गरेको हो । “हामीले स्थानीयसँग भएको सहमति अनुसार सम्बन्धित निकायकोे स्वीकृति लिएरै सडकमा पक्की नाला निर्माणका लागि जेसिवी प्रयोग गरेका हौं वन मास्न गरेका हैनौं”–मल्टीप्रपोजका अध्यक्ष सूर्य लामाले भन्नु भयो । उहाँले आफुहरुले कटारी नगरपालिकाको वडा नम्बर ४, ७, ८ र ९ का वडावासीको हितमा सडक निर्माणको काम गरेकोले डिभिजन वन कार्यालयले नियन्त्रणमा लिएको आफुहरुको जेसिवी निःशर्त छोड्नु पर्ने माग गर्नु भएको छ । जसले जनताको हितमा काम गर्छ, उसैलाई वन मासेको आरोप लगाएर जेसिवी नियन्त्रणमा लिने वन कार्यलयको कदम उचित नभएको मल्टीप्रपोजका अर्का संचालक धिरज खड्काले भन्नु भयो । अरुले वनमा डोजर लगाउँदा सम्म केही भएन हामीले सडकमा पक्की नाला निर्माण गर्दा अपराध भयो ? संचालक खड्काले प्रश्न गर्नु भयो । साथै उहाँले नाला खन्न प्रयोग भएको जेसिवी सिद्धीचरण मल्टीप्रपोजको नभई युनाईटेड कन्ट्रक्सनको भएको पनि बताउनु भएको छ । आफुहरुले भाडामा प्रयोग गरेको जेसिवी वन कार्यालयले नियन्त्रणमा लिएकोले अविलम्ब छोड्न समेत उहाँले आग्रह गर्नु भएको छ । यता डिभिजन वन कार्यालय त्रिवेणी कटारीका प्रमुख वन अधिकृत उपेन्द्र प्रसाद पटेलले आफुहरु विकासको वाधक नभएको तर आफुहरुलाई थाहै नदिई वन क्षेत्रमा सडक खनेकोले जेसिवी नियन्त्रणमा लिएको बताउनु भयो । जेसिवी पक्राउको विषयमा अनुसन्धान भई रहेकोले पक्रिया पुरा गरी छोडिने उहाँले बताउनु भयो । डिभिजन वन कार्यालय त्रिवेणीले गत शनिवार कटारी ४ स्थित मरुवाहरित सामुदायिक वन क्षेत्रबाट ना १ क ५४७३ नम्बरको जेसिवी नियन्त्रणमा लिएको थियो । जेसिवी नियन्त्रणका क्रममा वन कार्यलयका एक कर्मचारी समेत घाईते भएका थिए । नियन्त्रित जेसिवी डिभिजन वन कार्यालयमै राखिएको वन कार्यालयले जनाएको छ ।